मकवानपुर। बिहीबार सम्पन्न प्रतिनिधिसभा सदस्य निर्वाचनमा वामपन्थी दलहरूलाई ठुलो धक्का लागेको छ । शनिवार ३ बजेसम्म १६२ स्थानको मतगणना हुँदा नयाँ दल राष्ट्रिय स्वतन्त्र पार्टी९रास्वपा०ले ४२ सिट जितेको छ भने ७७ स्थानमा अग्रता कायमै राखेको छ । तीन वर्षअघि खुलेको रास्वपाको पक्षमा सुनामी लहर आउँदा पुराना वामपन्थी दल नेकपा एमाले, नेपाली कम्युनिस्ट पार्टी इतिहासकै गम्भीर संकटमा फसेका छन् ।
नेकपा एमालेले २ स्थानमा विजयी हुँदा ८ स्थानमा अग्रता कायमै राखेको छ । यता २६ वटा वामपन्थी घटक मिलेर बनेको नेपाली कम्युनिस्ट पार्टीले २ स्थानमा विजयी हुँदा ६ स्थानमा अग्रता कायम राखेको छ । २०४८ सालदेखि लगातार संसदमा उपस्थिति जनाएको नेपाल मजदुर किसान पार्टी र राष्ट्रिय जनमोर्चाले एक सिट पनि जित्न सकेन । १२ वर्षपछि निर्वाचनमा होमिएको विप्लव नेतृत्वको नेकपा माओवादीले अहिलेसम्म एक सिट जित्ने स्थितिमा छैन ।
नेकपाबाट अहिलेसम्म संयोजक पुष्पकमल दाहाल प्रचण्ड मात्र विजयी भएका छन् । प्रचण्ड रुकुम पूर्वबाट विजयी भएका हुन् । सहसंयोजक माधव कुमार नेपाल निकटतम प्रतिस्पर्धी पनि बन्न सकेका छैनन् । साबिक माओवादी केन्द्र र एकीकृत समाजवादीबाट ६र६ जना पदाधिकारी चुनावी मैदानमा उत्रिएका छन् । साबिक नेपाल समाजवादी पार्टीबाट दुई जना र मातृभूमि जागरण अभियानबाट एक जना चुनावी प्रतिस्पर्धामा छन् ।
कसको के छ अवस्था
तीन पटक प्रधानमन्त्री बनेका प्रचण्ड २०६४ सालदेखि लगातार संसदीय निर्वाचन जित्दै आएका छन् । जेनजी आन्दोलनपछि विषम परिस्थितिलाई मध्यनजर गरी यो पटक माओवादी आधार क्षेत्र पुगेका उनी १० हजार २४० मत ल्याएर विजयी भए । निकटतम प्रतिद्वन्द्वी एमालेका लीलामणि गौतमले तीन हजार ४६२ मत प्राप्त गरे ।
साबिक माओवादीका वरिष्ठ उपाध्यक्ष नारायणकाजी श्रेष्ठ तेस्रो पटक हार्ने लाइन देखिएका छन् । २०७० सालको संविधानसभा सदस्य निर्वाचनमा मकवानपुर–२ बाट पराजित भएको उनी २०७४ सालमा गोरखा–२ बाट पराजित भएका थिए । यो पटक सर्लाही–३ पुगेका उनी ९ हजार ६१४ मत ल्याएर दोस्रो स्थानमा छन् । पहिलो स्थानमा रास्वपाका नरेन्द्र साह कलवार २७ हजार ३५८ मतसहित अग्र स्थानमा छन् ।
नेकपाका नेता शक्ति बहादुर बस्नेत जाजरकोट–१ बाट पराजित भएका छन् । २०६४ सालदेखि लगातार विजयी भएका बस्नेत पहिलो पटक पराजय भएका हुन् । कांग्रेसका खड्गबहादुर बुढा २० हजार १४२ मत ल्याएर विजयी हुँदा बस्नेतले १६ हजार ८८३ मत प्राप्त गरे । उनी साबिक माओवादीका उपमहासचिव थिए ।
महोत्तरी–१ बाट अर्का नेता गिरिराजमणि पोखरेल पराजित भएका छन् । पोखरेलको यो दोस्रो हार हो । रास्वपाको प्रमेद कुमार महतोले ३४ हजार ६३६ मत ल्याएर विजयी हुँदा उनले जम्मा १२ हजार ६२४ मत प्राप्त गरे । पार्टी एकताअघि पोखरेल माओवादी केन्द्रका उपमहासचिव थिए ।
नेकपाका पूर्वपदाधिकारीलाई ठुलो धक्का लाग्दा साबिक माओवादी केन्द्रका वर्षमान पुन विजयी उन्मुख देखिएका छन् । रोल्पा–१ उम्मेदवार बनेका उनी २१ हजार ७४ मत सहित अग्रता कायमै राखेका छन् । पुनलाई कांग्रेसका पुनम कुमारी वलीले ९ हजार ६९८ मत प्राप्त गरेका छन् । पुन २०७० सालदेखि लागातार रोल्पाबाट चुनाव जितेका छन् ।
साबिक माओवादी केन्द्रका अर्का उपमहासचिव मातृका प्रसाद यादव धनुषा–१ मा झिनो मतले पछाडि छन् । यो क्षेत्रमा मतगणना प्रक्रिया अगाडि बढेको छैन । प्रारम्भिक नतिजा अनुसार एमालेका रामचन्द्र मण्डल ६११ मतले अग्रता लिएका छन् । यादवले ५०९ मतले पछ्याएका छन् ।
पूर्वप्रधानमन्त्री तथा नेकपाका सहसंयोजक माधव कुमार नेपाललाई ठुलो धक्का लागेको छ । रौतहट–१ बाट उम्मेदवार रहेका उनी ७ हजार ६६९ मत सहित चौथा स्थानमा छन् । रास्वपाका राजेश कुमार चौधरी २८ हजार ९४६ सहित अग्रता लिएका छन् । दोस्रो एमालेका अजय कुमार गुप्ता १० हजार ६९३ र तेस्रोमा कांग्रेसका अनिल कुमार झाले ८ हजार ५७४ मत प्राप्त गरेका छन् ।
एकीकृत समाजवादीका वरिष्ठ उपाध्यक्ष रहेका राजेन्द्र प्रसाद पाण्डे ११ हजार ३०४ मत सहित दोस्रो स्थानमा रहेका छन् । धादिङ–१ बाट उम्मेदवार रहेका पाण्डेलाई रास्वपाका आशिका तामाङले २४ हजार ४८ मतले पछाडि पारेकी छिन् । उनले २०६४ सालको बाहेक हरेक निर्वाचन जित्दै आएका थिए ।
रौतहट–४ बाट उम्मेदवार रहेका रामकुमार भट्टराई ८ हजार ८३५ मत ल्याएर तेस्रो स्थानमा छन् । रास्वपाका गणेश पौडेल २८ हजार ७८१ मत लाएर अग्रस्थानमा छन् । दोस्रोमा कांग्रेसका देवप्रसाद तिमिल्सिना १३ हजार २५५ मत प्राप्त गरेका छन् । भट्टराई साबिक एकीकृत समाजवादीका उपमहासचिव थिए ।
दाङ–१ बाट उम्मेदवार रहेका मेटमणि चौधरीले तीन हजार ४७८ मत सहित चौथो स्थानमा छन् । यस क्षेत्रमा रास्वपाका देवराज पाठक २७ हजार २७१ मत सहित अग्रस्थानमा छन् । दोस्रोमा कांग्रेसका योगेन्द्र चौधरीले १० हजार ५३२ र तेस्रोमा एमालेका रेवतीरमण शर्मा घिमिरेले ४ हजार ४८९ मत प्राप्त गरेका छन् । साबिक एकीकृत समाजवादीका सचिव बलदेव चौधरी तीन हजार ९३ मत सहित पाँचौँ स्थानमा छन् । यस क्षेत्रमा रास्वपाका पारसमणि गेलाल ११ हजार ५७२ मत ल्याएर अग्रता लिएका छन् ।
पाल्पा–२ मा नेकपाबाट उम्मेदवार रहेका सोमप्रसाद पाण्डेय तीन हजार ४३० मत सहित चौथो स्थानमा छन् । यो क्षेत्रमा माधव बहादुर थापा १० हजार ९४४ मत ल्याएर अग्रता स्थानमा छन् । दोस्रोमा हिमाल दत्त श्रेष्ठले ५ हजार ५०७ मत प्राप्त गरेका छन् । तेस्रोमा एमालेका ठाकुर प्रस्राद गैरेले ५ हजार २१५ मत प्राप्त गरेका छन् ।
पूर्वउपप्रधानमन्त्री तथा नेकपा अछाम–१ का उम्मेदवार डा। भीम बहादुर रावल पराजित भएका छन् । कांग्रेसका भरत कुमार स्वाँर १० हजार ७५९ मत ल्याएर विजयी हुँदा रावलले १० हजार २३३ मत प्राप्त गरे । एमालेमा ५१ वर्ष सक्रिय राजनीति गरेका रावल निष्कासनबाट परेपछि मातृभूमि जागरण अभियान खोलेका थिए ।
यता नेपाल समाजवादी पार्टीका अध्यक्ष रहेका महिन्द्रराय यादव ३० हजारको फराकिलो मतान्तरले दोस्रो स्थानमा छन् । रास्वपाका रविन महतोले ३८ हजार ३२५ मत ल्याएर अग्रता लिएका छन् भने यादवले ८ हजार ७१ मत प्राप्त गरेका छन् । नेसपाका महासचिव रहेका रमेशप्रसाद यादव ४८५ मत सहित छौटौँ स्थानमा छन् । रास्वपाका चन्दन कुमार सिंह १७ हजार ५४७ मत सहित अग्रस्थानमा छन् ।
