मंसिर २० गतेदेखि सुरु हुन लागेको सडक विस्तारको अभियानमा अवरोध गर्नेलाई कडा कारबाही गर्ने सिडिओको चेतावनी

मकवानपुर । हेटौंडामा मंसिर २० गतेदेखि सुरु हुन लागेको सडक विस्तार अभियानमा अवरोध गर्नेहरूमाथि कडा कारबाही हुने जिल्ला प्रशासन कार्यालय मकवानपुरले चेतावनी दिएको छ।

बुधबार प्रमुख जिल्ला अधिकारी (सिडिओ) वसन्त अधिकारीद्वारा हस्ताक्षरित सूचना जारी गर्दै प्रशासनले केही व्यक्तिहरूले धाक–धम्की दिने, जबर्जस्ती पसल बन्द गराउने तथा सडक विस्तार अभियानमा अवरोध पुर्‍याउने गतिविधिप्रति ध्यानाकर्षण भएको उल्लेख गरेको छ। सूचनामा यस्ता कानूनविपरीत कार्य नगर्न–नगराउन आग्रह गरिएको छ।

सडक डिभिजन कार्यालय मकवानपुरले मिति २०८२/०८/०५ मा जारी गरेको सूचना अनुसार सडक विस्तारका सबै तयारी पूरा भएको जानकारी दिँदै प्रशासनले उक्त अभियान सहज रूपमा सम्पन्न गराउन सबै पक्षसँग सहयोगको अपेक्षा गरेको छ।