मकवानपुर । सुदूरपश्चिम प्रदेशमा सवारी दुर्घटनाको अवस्थामा सुधार हुन सकेको छैन । तीव्र गति, सवारी नियमको उल्लंघन र सडकको अवस्थाका कारण दैनिकजसो दुर्घटनामा मानिसहरूको मृत्यु भइरहेको छ ।
सुदूरपश्चिम प्रदेश प्रहरी कार्यालयका अनुसार साउन १ गतेदेखि चैत मसान्तसम्म प्रदेशभर कुल १ हजार ३८ वटा सवारी दुर्घटना भएका छन्, यी दुर्घटनाहरूमा १६५ जनाले ज्यान गुमाएका छन् ।
प्रहरीका अनुसार दुर्घटनामा घाइते हुनेहरूको संख्या पनि निकै ठुलो छ । ९ महिनाको अवधिमा १ हजार ७ सय ५५ जना मानिस घाइते भएका छन् । घाइतेमध्ये धेरैजसो अंगभंग भएका छन् ।
सुदूरपश्चिमका ९ मध्ये तराईका दुई जिल्ला कञ्चनपुर र कैलालीमा दुर्घटनाको दर सबैभन्दा उच्च देखिएको छ । तथ्यांकअनुसार यो ९ महिनाको अवधिमा सबैभन्दा बढी दुर्घटना कञ्चनपुर जिल्लामा भएका छन् ।कञ्चनपुरमा ४ सय ६९ वटा सवारी दुर्घटना भएका छन् ।
त्यसैगरी प्रदेशको हालको राजधानीसमेत रहेको कैलालीमा ३ सय ५८ वटा दुर्घटना भएका छन् । सुदूरपश्चिम प्रदेश प्रहरी कार्यालयका सहायक प्रवक्ता एवं प्रहरी उपरीक्षक (एसपी) सागर बोहराका अनुसार ९ महिनाको अवधिमा प्रदेशभरमै कञ्चनपुर जिल्ला सवारी दुर्घटनाका हिसाबले सबैभन्दा बढी प्रभावित देखिएको छ ।
सडक दुर्घटनाका कारण पशुचौपायहरू पनि प्रभावित भएका छन् ।
छाडा चौपायाका कारण पनि दुर्घटना बढ्ने गरेको पाइन्छ । तथ्यांकअनुसार यस अवधिमा सडक दुर्घटनामा परी १६ वटा चौपायाको मृत्यु भएको छ भने ७ वटा चौपाया घाइते भएका छन् । राजमार्गमा जथाभावी छाडिने चौपाया र तीव्र गतिको सवारी नै यस्तो दुर्घटनाको मुख्य कारण बन्ने गरेको छ ।
प्रहरीले सडक दुर्घटना कम गर्न र ट्राफिक नियम पालना गराउन सक्रियता देखाएको दाबी गरेको छ । सवारी नियम उल्लंघन गर्ने चालकहरूलाई कारबाही गर्ने क्रममा ९ महिनाको अवधिमा ट्राफिक नियम कसुर गरेबापत प्रहरीले २ करोड १९ लाख ६४ हजार ५ सय रुपैयाँ राजस्व संकलन गरेको छ ।
