मकवानपुर।पछिल्लो २४ घण्टामा देशका विभिन्न स्थानमा भएका सवारी दुर्घटनामा पाँच जनाले ज्यान गुमाएका छन्। नवलपरासी पूर्व, कञ्चनपुर, धादिङ, सुनसरी र दाङमा भएका छुट्टाछुट्टै दुर्घटनामा उनीहरूको मृत्यु भएको हो।
नवलपरासी पूर्वको गैँडाकोट नगरपालिका–४ स्थित कालिगण्डकी चोकमा ना.५ ख ९००६ नम्बरको ट्रकले ना.२८ प ४२६० नम्बरको मोटरसाइकललाई ठक्कर दिँदा २८ वर्षीय नवीन घताने गम्भीर घाइते भएका थिए। उपचारका लागि नयाँ मेडिकल कलेज भरतपुर लगिएकोमा उपचारकै क्रममा उनको मृत्यु भएको प्रहरीले जनाएको छ। घटनापछि ट्रक चालकलाई प्रहरीले नियन्त्रणमा लिएको छ।
कञ्चनपुरको बेलौरी नगरपालिका–१० सडकघाटमा से.३ प २००८ नम्बरको मोटरसाइकल अनियन्त्रित भई दुर्घटना हुँदा चालक २८ वर्षीय मानबहादुर चौधरीको ज्यान गएको छ। शुक्रबार राति भएको उक्त दुर्घटनामा गम्भीर घाइते भएका चौधरीको श्रीपुर प्राथमिक स्वास्थ्य केन्द्रमा उपचारका क्रममा मृत्यु भएको हो।
धादिङको बैरेनी बजारमा दुईवटा मोटरसाइकल एकआपसमा ठोक्किँदा ३९ वर्षीय होमबहादुर तामाङको मृत्यु भएको छ। बा.८२ प २९६५ र बा.प्र.०२–०६४ प ५७८६ नम्बरका मोटरसाइकल जुध्दा भएको दुर्घटनापछि प्रहरीले अर्का चालकलाई नियन्त्रणमा लिएर अनुसन्धान सुरु गरेको छ।
सुनसरीको रामधुनी नगरपालिका–६ इचोलमा कारले सफारीलाई ठक्कर दिँदा ६० वर्षीय भीमबहादुर कार्कीको मृत्यु भएको छ। बागमती प्रदेश १–०३३ च ८८७८ नम्बरको कारको ठक्करबाट गम्भीर घाइते भएका सफारी चालक कार्कीको धरानस्थित घोपा अस्पतालमा उपचारका क्रममा निधन भएको हो।
त्यस्तै, दाङको तुलसीपुर उपमहानगरपालिका–१४ ढ्याङपुरमा लु.३ त ७६५१ नम्बरको ट्याक्टर अनियन्त्रित भई पल्टिँदा ३५ वर्षीय कलेशु चौधरीको ज्यान गएको छ। दुर्घटनामा घाइते भएका अन्य दुई जनाको राप्ती प्रादेशिक अस्पतालमा उपचार भइरहेको छ।
प्रहरीले यी सबै घटनाबारे थप अनुसन्धान गरिरहेको जनाएको छ।
