मकवानपुर । श्रम तथा रोजगार कार्यालय मकवानपुर, हेटौंडा उपमहानगरपालिका, वडा प्रहरी कार्यालय र बाल हेल्पलाइन नेपालको संयुक्त टोलीले अनुगमन गर्ने क्रममा हेटौँडा–४ का विभिन्न वर्कसप तथा ग्यारेजबाट ७ जना बालश्रमिकको उद्दार गरेको छ ।
अनुगमन टोलीले शाह मोटरसाइकल डेन्टपेन्ट ग्यारेजबाट १५ वर्षका एक जना बालकलाई उद्दार गरेको छ । यस्तै, न्यू हेटौँडा बाइक सर्भिस ग्यारेजबाट १७ वर्षका २ जना बालकलाई टोलीले उद्दार गरेको जनाएको छ ।
त्यस्तै जेके टायर मर्मतबाट १७ वर्षका एक जना बालक र अण्डा बोक्ने बोलेरो गाडीबाट १४ र १५ वर्षका २ जना बालकलाई उद्दार गरिएको छ । न्यू आशिया मेकानिकल वर्कसपबाट १७ वर्षका एक जना बालकसहित ७ जना बालश्रमिकको उद्दार गरि बाल हेल्पलाइनको संरक्षणमा राखिएको छ ।
उद्दार गरिएका बालकहरू १ जना भारत, २ जना हेटौँडा–१७ का, १ जना झापा, १ जना वीरगञ्ज र २ जना पर्सा जिल्लाका रहेका छन् । चालु आर्थिक वर्ष २०८२ /०८३ मा यस किसिमको बालश्रम अनुगमनमार्फत विभिन्न क्षेत्रबाट २२ जना बालक र ३ जना बालिका गरी जम्मा २५ जना बालश्रमिकहरु उद्दार गरिएको हेल्पलाइनले जनाएको छ ।
