मकवानपुर । सिन्धुलीमा प्रतिनिधिसभा निर्वाचनको मत गणना बिहान ११ बजेबाट गरिने भएको छ । सिन्धुलीमा बिहान बसेको सर्वदलीय बैठकले ११ बजेबाट मतगणना गर्ने सहमति जनाएको हो ।
जिल्ला प्रशासन कार्यालय, सिन्धुलीको सभा हलमा बसेको सर्वदलीय बैठकले बिहान ११ बजेदेखि मतगणना सुरु गर्ने निर्णय गरेको मुख्य निर्वाचन अधिकृत कमल राज विष्टले जानकारी दिए । उनकाअनुसार जिल्लाको दुवै निर्वाचन क्षेत्रको मतगणना बिहान ११ बजेदेखि सुरु हुनेछ ।
सिन्धुली–१ को मुख्य निर्वाचन अधिकृतको कार्यालयको भुईतला र मकवानपुर–२ को सोही भवनको दोस्रो तलामा ३÷३ स्थानबाट मतगणना गरिनेछ ।
सिन्धुली–१ मा फिक्कल गाउँपालिकाबाट मतगणना सुरु गरिने छ भने त्यसपछि क्रमशः गोलञ्जोर गाउँपालिका, तिनपाटन गाउँपालिका, दुधौली नगरपालिका हुँदै अन्तिममा कमलामाई नगरपालिकाको वडा नम्बर ९, १३ र १४ को मतगणना गरिने सर्वदलीय बैठकको निर्णय छ ।
त्यसैगरी, सिन्धुली–२ को मतगणना सुनेकासी गाउँपालिकाबाट सुरु गरिने र क्रमशः घ्याङलेख गाउँपालिका, मरिण गाउँपालिका, हरिहरपुरगढी गाउँपालिका र अन्तिममा कमलामाई नगरपालिकाको मतगणना गरिने छ ।
सिन्धुलीमा बिहीबार सम्पन्न मतदानमा ५३।५८ प्रतिशत मत खसेको छ । कुल २ लाख १५ हजार १९ मतदातामध्ये १ लाख १५ हजार २१४ जनाले आफ्नो मताधिकार प्रयोग गरेका छन् ।
