सुनसरी । आगामी फागुन २१ गते हुने प्रतिनिधिसभा निर्वाचनको मिति नजिकिँदै जाँदा सुनसरी जिल्लामा राजनीतिक दलहरूले निर्वाचन आचारसंहिता पूर्ण रूपमा पालना गर्ने सामूहिक प्रतिबद्धता जनाएका छन्। जिल्ला प्रशासन कार्यालय सुनसरीमा आइतबार आयोजित सर्वदलीय बैठकमा सहभागी विभिन्न दलका प्रतिनिधिहरूले निर्वाचनलाई मर्यादित, शान्तिपूर्ण र निष्पक्ष बनाउन यस्तो सहमति गरेका हुन्।
निर्वाचन आयोगले तोकेका नियमहरूको उल्लंघन नगरी स्वस्थ प्रतिस्पर्धामा उत्रिने उनीहरूको उद्घोषले जिल्लाको चुनावी वातावरणलाई थप जिम्मेवार बनाएको छ। सुनसरीका प्रमुख जिल्ला अधिकारी वासुदेव घिमिरेका अनुसार बैठकमा सहभागी दलहरूले फागुन १२ गतेभित्र निर्वाचन आचारसंहिता विपरीत राखिएका सबै प्रकारका प्रचार सामग्री र ब्यानरहरू हटाउन मन्जुर गरेका छन्।
तोकिएको समयसीमाभित्र सामग्री नहटाएमा कानुनबमोजिम कडा कारबाही गर्ने चेतावनी प्रशासनले दिएको छ। विशेष गरी चुनावी प्रचारप्रसारका क्रममा चर्को आवाजमा बज्ने डिजेको प्रयोगलाई पूर्ण रूपमा निषेध गर्ने र सामाजिक सद्भावमा खलल पुग्ने कुनै पनि गतिविधि नगर्ने विषयमा सबै पक्ष सहमत भएका छन्। यस निर्णयले सर्वसाधारणलाई ध्वनि प्रदूषण र अनावश्यक तनावबाट राहत मिल्ने अपेक्षा गरिएको छ।
सुरक्षाको दृष्टिकोणले पनि सुनसरी प्रशासनले उच्च सतर्कता अपनाएको छ। जिल्लाका प्रहरी उपरीक्षक केशव थेबेले निर्वाचनलाई भयरहित वातावरणमा सम्पन्न गराउन सुरक्षा संयन्त्र पूर्ण रूपमा तयार रहेको जानकारी दिएका छन्। बैठकमा नेपाली कांग्रेसका जिल्ला सभापति केदार भण्डारी, नेकपा एमालेका सचिव राम कोइराला, राष्ट्रिय स्वतन्त्र पार्टीका जिल्ला सभापति सागर दाहाल र जसपाका महेन्द्र यादव लगायतका नेताहरूको उपस्थिति रहेको थियो।
उनीहरूले आ–आफ्नो पार्टीका कार्यकर्ताहरूलाई संयमित रहन र आचारसंहिताको दायराभित्र बसेर चुनावी अभियान सञ्चालन गर्न निर्देशन दिने बताएका छन्।
निर्वाचनका लागि आवश्यक पर्ने प्राविधिक र भौतिक तयारी पनि अन्तिम चरणमा पुगेको छ। मतपत्र लगायतका सम्पूर्ण निर्वाचन सामग्रीहरू जिल्ला आइपुगिसकेका छन् र तिनलाई सम्बन्धित निर्वाचन क्षेत्रहरूमा पठाउने काम भइरहेको छ। सुनसरीका ४ वटा निर्वाचन क्षेत्रमा कुल १६७ मतदान स्थलहरू तोकिएका छन्, जहाँ सुरक्षा र व्यवस्थापनका पक्षलाई मजबुत बनाइएको छ।
