मकवानपुर । मकवानपुरको कैलाश गाउँपालिकाले आगामी चैतमा सञ्चालन हुने एसईई परीक्षार्थीहरुलाई खाना र आवासको व्यवस्था गर्ने गाउँपालिकाका अध्यक्ष लोकबहादुर मुक्तानले बताउनुभयो । मंगलबार कालिका माविमा आयोजित कक्षा ११ का विद्यार्थीलाई स्वागत गर्ने कार्यक्रमलाई सम्बोधन गर्दै अध्यक्ष मुक्तानले अन्य तहमा परीक्षा केन्द्र रहेर परीक्षा दिने विद्यार्थीहरुका लागि खाना र आवासको व्यवस्था गरिने बताउनु भएको हो ।
गत वर्षबाट गाउँपालिकामा कालिका मावि परीक्षा केन्द्र तोकिएसँगै विद्यार्थीहरुलाई सहजता भएको उहाँले बताउनुभयो । कालिका माविका विद्यार्थीले भने हेटौंडामा परीक्षा दिनुपर्ने भएकाले उनीहरुको लागि पनि गाउँपालिकाले खाना र आवासको व्यवस्था गर्ने बताउनुभयो ।
विद्यार्थीहरुले लगनशीलताका साथ अध्ययन गर्न आग्रह गर्दै अनुशासनका साथ पढाई गरी राम्रो नतिजा ल्याउन उहाँले आग्रह गर्नुभयो । कैलाशको शिक्षा सुधारोन्मुख रहेकाले एसईईमात्र नभई कक्षा १२ को नतिजामा पनि विद्यार्थीहरुले ध्यान दिनुपर्ने मुत्तानको भनाइ छ ।
कार्यक्रममा वडा अध्यक्ष भुवन सिंह घलानले कक्षा ११ मा अध्ययन गर्ने सबै विद्यार्थीलाई राम्रो नतिजा निकालेर अध्ययन गर्न आग्रह गर्नुभएको छ । शिक्षा क्षेत्रमा गाउँपालिकाले गरेको लगानीबाट शिक्षामा सुधार हुनुका साथै यहाँका विद्यार्थी उच्च शिक्षाका लागि हेटौंडालगायत अन्य शहरमा पुग्ने विश्वास लिएको उहाँले बताउनुभयो ।
कक्षा १२ का विद्यार्थी आशिका पुडासैनीको अध्यक्षतामा भएको स्वागत सम्मान कार्यक्रममा वडा अध्यक्ष घलान, विद्यालय व्यवस्थापन समितिका अध्यक्ष मदनप्रसाद बर्तौला, गाउँपालिकाका शिक्षा शाखा प्रमुख समीर जोशी, विद्यालयका प्रधानाध्यापक रामप्रसाद कालाखेती, सहायक प्रधानाध्यापक रामचन्द्र पौड्याल, पूर्वप्रधानाध्यापक राजाराम पराजुलीलगायतको आतिथ्य रहेको थियो ।
कक्षा १२ का विद्यार्थीहरुले कक्षा ११ मा भर्ना भएका विद्यार्थीहरुलाई स्वागत गरेका थिए । कक्षा १२ मा अध्ययनरत सुस्मिता थिङ र कक्षा ११ मा अध्ययनरत अस्मिता ब्लोनले आफ्नो भनाइ राखेका थिए । कालिका माविमा शिक्षा र व्यवस्थापनका विषय अध्यापन हुँदै आइरहेको छ ।
