मकवानपुर । नेपाली राष्ट्रिय महिला फुटबल टोलीकी कप्तान सावित्रा भण्डारी ‘साम्बा’ले आफ्नो उपचारका लागि रकम पुगिसकेको बताएकी छन् ।
आज सामाजिक सञ्जालमार्फत उनले नेपाली बैंक खातामा १ करोड रुपैयाँभन्दा बढी र विदेशी प्लेटफर्ममा ५३ हजार न्युजिल्यान्ड डलर अर्थात् झन्डै ४५ लाख रुपैयाँ सङ्कलन भइसकेको जानकारी दिएकी छन् ।
सावित्राले उपचारका लागि पाएको अपार साथ, विश्वास र आर्थिक सहयोगप्रति आभार व्यक्त गर्दै अब सहयोग रकम रोकिदिन आग्रह गरेकी हुन् । उनले पछिल्लो २४ घन्टामा पाएको माया र समर्थनलाई शब्दमा व्यक्त गर्न नसकिने बताएकी छन् ।
अस्ट्रेलियन ‘ए’ लिग फुटबल खेल्ने क्रममा डेढ महिनाअघि साम्बाको घुँडामा चोट लागेको थियो । वेलिङ्गटन फिनिक्समा आबद्ध उनी ब्रिस्बेन रोअरसँगको खेलका क्रममा विपक्षी टोलीकी गोलकिपरसँग ठोक्किन पुगेकी थिइन् ।
हिजो सामाजिक सञ्जाल फेसबुकमा लेख्दै सावित्राले घुँडाको गम्भीर चोटको उपचारका लागि सहयोग गर्न आग्रह गरेकी थिइन् । उनले उपचारका लागि ८० हजार अमेरिकी डलर खर्च लाग्ने बताएकी थिइन तर त्यो भन्दा बढी पैसा उठिसकेको बताएकी छन् ।
