मकवानपुर । कैलालीमा तरकारी बोकेको गाडीले ठक्कर दिँदा एक जनाको मृत्यु भएको छ । तीनजना घाइते भएका छन् ।
पूर्व–पश्चिम राजमार्गअन्तर्गत कैलालीको घोडाघोडी नगरपालिका –२ टनकपुरमा आइतबार बिहान दुर्घटना भएको हो । पूर्वबाट पश्चिमतर्फ आउँदैगरेको लु २ च २३५८ नम्बरको तरकारी बोकेको मिनिट्रकले तरकारीका बेर्ना बेच्न हिडेका साइकलयात्री र पैदलयात्रुलाई ठक्कर दिएको थियो ।
मिनीट्रकले एकै ठाउँमा लस्करै चार जनालाई ठक्कर दिएको जनाइएको छ । इलाका प्रहरी कार्यालय सुख्खडका प्रमुख डिएसपी रमेशराज अवस्थीले ट्रकको ठक्करबाट साइकलयात्री बर्दगोरिया गाउँपालिका –६ का ५५ वर्षीय शंकर डंगौराको मृत्यु भएको बताउनुभयो ।
डिएसपी अवस्थीले घाइते हुनेमा पैदलयात्री घोडाघोडी नगरपालिका –२, साँडेपानीका ५४ वर्षीय पदमबहादुर शाही, बर्दगोरिया गाउँपालिका –६ कोटातुल्सिपुरका ४५ वर्षीय हर्कबहादुर डंगौरा र सोही ठेगानाकै २५ वर्षीय कृष्ण चौधरी रहेको जानकारी दिनुभयो । घाइतेहरुको घोडाघोडी अस्पतालमा सामान्य उपचारपछि धनगढी रिफर गरिएको छ ।
ट्रक र चालक रोल्पा जिल्ला त्रिवेणी गाउँपालिका वडा ४ बस्ने २३ बर्षीय सन्तोष घर्तीमगर प्रहरी नियन्त्रणमा रहेको जनाइएको छ । स्थानीयले उचित क्षतीपूर्तिको माग गर्दै केहीबेर सडकजाम गरेका थिए ।
