सरकारले ताकी–ताकी गोली हान्ने आदेश दिएको थिएन : ओली

मकवानपुर । पूर्व प्रधानमन्त्री एवम् नेकपा एमालेका अध्यक्ष केपी शर्मा ओलीले सरकारले ताकी–ताकी गोली हान्ने आदेश नदिएको बताउनुभएको छ ।

संविधान दिवसको अवसरमा शुभकामना सन्देशमार्फत उहाँले आफूले राजीनामा दिएपछि छानी–छानी सार्वजनिक तथा निजी सम्पत्ति, नेताका घरलगायतमा आगजनी र तोडफोड गरी क्षति गरिएको उल्लेख गर्नुभएको छ ।

जेन–जी आन्दोलनमा आह्वानकर्ताले नै घुसपैठ भएको बताएको उल्लेख गर्दै उहाँले सरकारले प्रदर्शनकारीलाई ताकी–ताकी गोली हान्ने आदेश नदिएको, प्रहरीसँग नभएका स्वचालित हतियारले गोली हानिएको र यो घटनाको छानबिन हुनुपर्ने समेत बताउनुभएको छ ।

जेन–जी आन्दोलनपछि भदौ २४ मा पदबाट राजीनामा दिएका उहाँलाई बालुवाटारबाट सेनाले हेलिकोप्टरमार्फत् ब्यारेकमा लगेर सुरक्षित राखेको थियो ।

ओली हिजो बेलुका ब्यारेकबाट निस्किएर भाडाको घर भक्तपुरको गुण्डुमा सर्नुभएको छ ।