मकवानपुर । प्रधानमन्त्री सुशीला कार्कीसँग नेपालका लागि नवनियुक्त चिनियाँ राजदूत महामहिम चाङ माओमिङले शुक्रबार सिंहदरबारमा शिष्टाचार भेटवार्ता गरेका छन्।
भेटका क्रममा प्रधानमन्त्री कार्कीले राजदूत माओमिङलाई नयाँ जिम्मेवारीका लागि बधाई दिँदै सफल कार्यकालको शुभकामना व्यक्त गरिन्। उनले राजदूतले आफ्नो कार्यकालमा नेपाल–चीन सम्बन्धलाई थप सुदृढ र उचाइमा पुर्याउन महत्वपूर्ण भूमिका खेल्ने विश्वास व्यक्त गरिन्।
राजदूत माओमिङले व्यस्त समयका बीच भेटका लागि अवसर उपलब्ध गराएकोमा प्रधानमन्त्रीप्रति आभार व्यक्त गरे। उनले नेपालमा शान्ति, सुरक्षा र कानुनको शासन कायम गर्दै शान्तिपूर्ण वातावरणमा निर्वाचन सम्पन्न हुने सुनिश्चितताका लागि सरकारलाई बधाई दिएका थिए। साथै, नेपालको लोकतान्त्रिक प्रक्रियामा चीनको साथ र सहयोग रहने प्रतिबद्धता दोहोर्याए।
प्रधानमन्त्री कार्कीले पनि नेपालको निर्वाचन प्रक्रियामा चीनबाट प्राप्त सहयोग र सद्भावका लागि कृतज्ञता व्यक्त गरिन्। विकासका विभिन्न परियोजना तथा साझेदारीका आयाममा चीनले पुर्याएको सहयोगप्रति नेपाल सरकार र नेपाली जनताको तर्फबाट धन्यवाद ज्ञापन गरिन्।
भेटका क्रममा दुवै पक्षले नयाँ वर्ष ९घोडा वर्ष० को अवसरमा शुभकामना आदानप्रदान गरेका थिए।
प्रधानमन्त्री कार्कीले नेपाल पञ्चशीलको सिद्धान्तप्रति प्रतिबद्ध रहेको र ‘एक चीन नीति’ अवलम्बन गर्दै आएको दोहोर्याइन्। उनले नेपालले आफ्नो भूमिलाई कुनै पनि छिमेकी मुलुकको अहित हुने गतिविधिका लागि प्रयोग हुन नदिने स्पष्ट पारेकी थिइन्।
क्षेत्रीय शान्ति र स्थायित्वका लागि आपसी सहकार्य थप मजबुत बनाउनुपर्ने आवश्यकता औंल्याउँदै प्रधानमन्त्रीले एक मुलुकको अस्थिरताले अर्को मुलुकमा समेत असर पार्न सक्ने बताइन्।
राजदूत माओमिङले नेपाल सरकारको स्पष्ट नीति र अडानप्रति चिनियाँ जनता तथा त्यहाँका राष्ट्रपतिको तर्फबाट धन्यवाद व्यक्त गरेका थिए।
