काठमाडौं । पछिल्ला दिनमा सडक दुर्घटना बढ्दै गएको छ । दुर्घटनामा परि जनधनको क्षति भए पनि सरोकारवालाहरूले दुर्घटना न्यूनीकरणमा चासो दिएका छैनन् ।
पछिल्लो १८ दिनको बिचमा देशका विभिन्न भागमा तीन ठुला सवारी दुर्घटना भएका छन् । दुर्घटनामा परी ४४ जना बढीले ज्यान गुमाएका छन् । दुर्घटना हुनुमा सडक संरचनालाई दोष दिने गरिएको छ । सडक दुर्घटना बढ्दै गए पनि सरकारले के कारणले दुर्घटना भइरहेको छ भन्ने कुनै छानबिन गर्ने गरेको छैन ।
प्रहरी वक्ता डीआईजी अभिनारायण काफ्लेका अनुसार दुर्घटना बढ्न थालेपछि कारणबारे विश्लेषण गर्न थालिएको छ ।
‘दुर्घटनाका विभिन्न कारण हुन्छन् । सडकको अवस्था, सवारीको अवस्था र चालकको लापरबाही प्रमुख हुन्’, प्रवक्ता काफ्लेले भने, ‘धादिङको दुर्घटना अनियन्त्रित भएर हुन पुगेको हो । हामी बढ्दो दुर्घटनाबारे विश्लेषण गर्दैछौँ ।’
माघ २२ गते बैतडीको पुर्चौडी–७ बडगाउँमा, माघ २९ गते रामेछापको सेलेघाट र फागुन ११ गते धादिङको बेनिघाट रोराङमा सवारी दुर्घटना हुँदा झण्डै चार दर्जनको ज्यान गुमाइसकेका छन् ।
पछिल्लो पटक गएराती धादिङको बेनिघाट रोराङमा भएको बस दुर्घटनामा सबैभन्दा धेरै १९ जनाले ज्यान गुमाएका छन् । पोखराबाट काठमाडौँ आउँदै गरेको ग १ ख १४२१ नम्बरको पृथ्वी यातायात व्यवसायी समितिको बस गए राति करिब एक बजेतिर धादिङको बेनिघाट रोराङ्ग गाउँपालिका–५ भैंसेगौडा भन्ने स्थानबाट त्रिशूली नदी किनारमा खसेर दुर्घटना भएको हो ।
घाइतेलाई उपचारका लागि काठमाडौँ लगायतका विभिन्न अस्पताल पठाइएको ट्राफिक प्रहरीले जनाएको छ ।
यसअघि माघ २२ गते बैतडीमा जन्ती बस दुर्घटनामा १३ जनाको मृत्यु भएको थियो भने २७ जना घाइतेको भएका थिए । पुर्चौडी नगरपालिका–७ बडगाउँ मोडमा पवनदुत यातायातको सुपप्र ०२००१ ख १११९ नम्बरको बस दुर्घटनामा हुँदा ६ जनाको घटनास्थलमै र अन्यको क्रममा मृत्यु भएको थियो ।
बैतडीमा बस दुर्घटना भएको पाँच दिन नबित्दै अर्को दुर्घटना रामेछापको त्रिवेणीघाटमा हुन पुग्यो । काठमाडौँबाट ओखलढुंगातर्फ जाँदै गरेको प्रदेश ३–०१–००५ ख ९९७५ नम्बरको बस माघ २७ मा दुर्घटना हुँदा १२ जनाको ज्यान गएको थियो । उक्त दुर्घटनामा ८ जना घाइते भएका थिए ।
