मकवानपुर । अमेरिकामा शक्तिशाली हिमआँधीका कारण जनजीवन प्रभावित बनेको छ ।
टेक्ससदेखि न्यू इङ्गल्याण्डसम्म फैलिएको आँधीले १० लाखभन्दा बढी घरमा विद्युत् आपूर्ति बन्द गराएको छ भने लुजियाना र टेक्ससमा कम्तीमा तीन जनाको मृत्यु पुष्टि भएको छ।
अहिलेसम्म १० हजारभन्दा बढी उडानहरू रद्द भएका छन् । भर्जिनियामा मात्र २०० भन्दा बढी सवारी दुर्घटनाहरू रिपोर्ट भएका छन्। अमेरिकाको आधाभन्दा बढी जनसंख्या करिब १८ करोड मानिस प्रतिकूल मौसमबाट प्रत्यक्ष प्रभावित भएका छन।
सामान्यतया न्यानो हुने टेक्सस, लुजियाना र टेनेसीमा तापक्रम औसतभन्दा १५–२० डिग्री सेल्सियस तल झरेको छ, जसले स्थानीय बासिन्दालाई थप प्रभावित बनाएको छ। अत्यन्त चिसोका कारण झन्डै आधा राज्यहरूमा सङ्कटकाल घोषणा गरिएको छ।
विद्यालयहरू बन्द भएका छन् भने अमेरिकी सिनेटको सोमबारका लागि तय मतदान समेत रद्द भएको छ। वासिङ्टन डिसीकी मेयर मुरियल बाउजरले यसलाई एक दशककै ठूलो हिमआँधी भनेकी छन्।
यो चिसोको लहर फेब्रुअरीको सुरुसम्म कायम रहने मौसम पूर्वानुमान गरिएको छ।