मकवानपुर । राष्ट्रिय सभामा आगामी फागुनमा रिक्त हुने पदका लागि मतदान सुरु भएको छ । सातवटै प्रदेशका मतदान केन्द्रमा बिहान ९ बजे शुरु भएको मतदान अपराह्न ३ बजेसम्म हुने निर्वाचन आयोगले जनाएको छ।
राष्ट्रियसभा सदस्य निर्वाचन अन्तर्गत बागमती प्रदेशमा दुई पदका लागि ६ उम्मेदवार चुनावी प्रतिस्पर्धामा छन् । मतदानका लागि हेटौँडा उपमहानगरपालिका–४ स्थित भुटनदेवी माध्यमिक विद्यालयमा मतदान केन्द्र स्थापना गरिएको छ ।
बागमतीमा एक घण्टाभित्र १४३ जनाले मतदान गरेका छन् । राष्ट्रिय सभा निर्वाचनमा स्थानीय तहमा प्रदेशसभा सदस्य, नगरपालिकाका प्रमुख तथा उपप्रमुख, गाउँपालिकाका अध्यक्ष र उपाध्यक्षले मतदान गर्ने व्यवस्था छ ।
बागमती प्रदेशमा एक महिला र एक खुला क्लस्टरअन्तर्गत दुई सिटका लागि विभिन्न दलबाट तीन महिला र तीन पुरुष उम्मेदवार प्रतिस्पर्धामा छन् । महिला क्लस्टरतर्फ नेपाली कांग्रेसबाट गीता देवकोटा, नेकपा माओवादी केन्द्रबाट सरोजकुमारी झा र नेपाल मजदुर किसान पार्टीबाट कविता महर्जन उम्मेदवार रहेका छन् ।
त्यसैगरी, अन्य क्लस्टरतर्फ नेकपा एमालेका डा प्रेमप्रसाद दङ्गाल, नेकपा माओवादी केन्द्र बाट प्रेम सापकोटा र नेपाल मजदुर किसान पार्टीबाट विक्रम ढुकुछु चुनावी मैदानमा छन् । प्रदेश सभाका ११० सदस्यमध्ये ६ जनाले राजीनामा दिएका कारण १०४ मतदाता कायम छन् ।
यस्तै स्थानीय तहतर्फ २३८ मध्ये एक जना निलम्बन र ३ जनाले राजीनामा दिएका कारण २३४ मतदाता कायम छन् । मतदान सुरु भएको एक घण्टामा स्थानीय तहतर्फ १११ र प्रदेश सभातर्फ ३९ जनाले मतदान गरेका छन् ।
