मकवानपुर । नेपाल एपीएफ क्लबलाई हराउँदै रुकुम पश्चिम भलिबल प्रशिक्षण केन्द्र नवौं एनभीए भलिबल च्याम्पियनशिपको पुरुषतर्फ सेमिफाइनलमा पुगेको छ ।
त्रिपुरेश्वरमा रहेको राष्ट्रिय खेलकुद परिषद् (राखेप) को कभर्डहलमा आज भएको तेस्रो क्वाटरफाइनलमा रुकुम पश्चिमले एपीएफलाई ३–१ को सेटमा हरायो । एपीएफले पहिलो सेट २५–२२ ले जितेको थियो ।
तर त्यसपछि रुकुम पश्चिमले लगातार दोस्रो सेट २५–२०, तेस्रो सेट २५–१६ र चौथा सेट २५–२० ले जित्यो । प्रतियोगिताको पुरुषतर्फको चौथो क्वाटरफाइनलमा अहिले त्रिभुवन आर्मी क्लब र खिल्जी युवा क्लब खेलिरहेका छन् ।
यसअघि आजै भएको पहिलो क्वाटरफाइनलमा बूढानीलकण्ठ भलिबल क्लबलाई हराउँदै हेल्प नेपाल स्पोर्ट्स क्लब र दोस्रो क्वाटरफाइनलमा कोशी प्रदेश भलिबल सङ्घलाई हराउँदै नेपाल पुलिस क्लब सेमिफाइनलमा पुगेका छन् ।
प्रतियोगितामा महिला र पुरुष दुवैतर्फका सेमिफाइनल भोलि तथा फाइनल पर्सि हुनेछ ।
