मकवानपुर । रसुवागढी अन्तर्राष्ट्रिय नाका आजदेखि पूर्णरूपमा सञ्चालनमा आएको छ । रसुवाका प्रमुख जिल्ला अधिकारी राजेश पन्थीका अनुसार गएको असार २४ गते ल्हेन्देखोलामा आएको बाढीले मितेरी पुल बगाएपछि पूर्णरूपमा बन्द भएको नाका आज बिहानदेखि सञ्चालनमा आएको हो ।
नाका सञ्चालनका लागि चीन सरकारले ९१ मिटर लामो बेलिब्रिज निर्माण गरेको छ । प्रमुख जिल्ला अधिकारी पन्थीका अनुसार पुलको भारवहन क्षमता ५५ टन बराबर रहेको छ ।
केरुङ नाका खुलेसँगै चिनियाँ सामान आयातका लागि आठ वटा नेपाली कन्टेनर मितेरी पुल पार गरि केरुङतर्फ प्रवेश गरिसकेका सीमा प्रहरी चौकी टिमुरेका प्रहरी निरीक्षक विक्रम कुँवरले जानकारी दिनुभयो । थप कन्टेनर जाने क्रममा छन् ।
नाका ठप्प भएकाले अघिल्लो वर्षको तुलनामा २२ अर्ब रुपैयाँभन्दा धेरै राजस्व नोक्सान भइसकेको प्रमुख भन्सार अधिकृत तुलसीप्रसाद भट्टराईले जानकारी दिनुभयो । पुल सञ्चालनमा आए पनि सडक जोखिमपूर्ण छ । सम्भावित दुर्घटना रोक्न प्रशासनलाई आग्रह गरेको कन्टेनर चालक रसुवा यार्साका सुकु तामाङले बताउनुभयो ।
असार २४ गतेको बाढीले दर्जनौँ ठाउँमा सडक कटान गरेपछि ट्र्याक खोल्ने काम मात्र भएको छ । टेवा पर्खाल मजबुत नबनाएकोले गाडी सञ्चालनमा जोखिम रहेको चालकहरू बताउँछन् ।
