मकवानपुर । बाँकेको दुर्गम र पिछिडिएको क्षेत्र मानिने नरैनापुर गाउँपालिकाको शिक्षा क्षेत्रमा देखिएका समस्या समाधानका लागि पालिकाभित्रका सबै विद्यालयको अनुगमन सुरु गरिएको छ ।
गाउँपालिकाको –२ का वडा अध्यक्ष मसुदअहमद साहको नेतृत्वमा पालिकाभित्रका सबै सामुदायिक तथा संस्थागत विद्यालयको शैक्षिक र भौतिक अवस्था मूल्याङ्कन गर्न अनुगमन सुरु गरिएको गाउँपालिकाले जनाएको छ ।
बिद्यालय अनुगमनको सुरुआत वडा २ स्थित मदरसा सिराजिया इस्रारुल उलुमबाट गरिएको वडा २ का वडा अध्यक्ष साहले बताउनुभयो । उहाँले पालिकाभित्रका शिक्षण संस्थाहरुको यथार्थ अवस्था बुझ्न अनुगमन सुरु गरिएको जनाउँदै क्रमशः सबै विद्यालयमा अनुगमन गरिने बताउनुुभयो ।
नरैनापुर गाउँपालिकाका अध्यक्ष तथा शिक्षा समिति संयोजक शैयद इस्तियाक अहमद साहले पालिकाभित्रका विद्यालय र मदरसाहरुमा देखिएका विभिन्न समस्याको समाधान आवश्यक भएकाले अनुगमन सुरु गराइएको जनाउँदै अनुगमन प्रतिवेदनबाट सुधार गर्ने बाटो खुल्ने बताउनुभयो ।
उहाँले शिक्षा सुधार पालिकाको पहिलो प्राथमिकता भएको हुँदा यसका लागि विशेष समिति गठन गरिएको बताउनुभयो । विद्यालय अनुगमनमा शिक्षक दरबन्दी, नियमितता, विद्यार्थी सङ्ख्या, भौतिक पूर्वाधार, सिकाइ गुणस्तर, परीक्षा प्रणाली र व्यवस्थापन पक्षको पारदर्शितालाई प्राथमिकतामा राखिएको गाउँपालिकाले जनाएको छ ।
शिक्षक र शिक्षा शाखाबीच हालै देखिएको आन्तरिक द्वन्द्वपछि शैक्षिक वातावरण प्रभावित बनेकाले पालिकाले अनुगमनलाई प्राथमिकताका साथ अघि बढाएको गाउँपालिकाका अध्यक्ष साहले बताउनुभयो ।
अनुगमनपछि विस्तृत प्रतिवेदन तयार गरी शिक्षा सुधारका लागि ठोस कार्ययोजना बनाइने अनुगमन समितिका संयोजक तथा वडा नम्बर २ का वडा अध्यक्ष शाहले बताउनुभयो ।
अनुगमनको सुरुवात गरिएको मदरसा सिराजिया इस्रारुल उलुमका प्रधानाध्यापक लाल खाँले विद्यालयको वास्तविक अवस्था बुझ्न निष्पक्ष अनुगमन सुरु हुनु सकारात्मक भएको जनाउँदै यसबाट राम्रो परिणाम आउने आशा रहेको बताउनुभयो ।
