मकवानपुर । सरकार र दुग्ध किसानबीच मंगलबार वार्ता हुँदैछ। केहीबेरपछि सिंहदरबारमा कृषिमन्त्री रामनाथ अधिकारीसँग वार्ता तय भएको केन्द्रीय दुग्ध सहकारी संघका महासचिव रामप्रसाद आचार्यले जानकारी दिए।
दूधको बाँकी बक्यौता भुक्तानीको मागसहित किसान आइतबारदेखि सडकमा आएका छन्। आचार्यका अनुसार दुग्ध विकास संस्थानबाट एक अर्ब र निजी डेरीहरूबाट साढे दुई अर्ब गरी साढे तीन अर्ब भुक्तानी लिन बाँकी छ।
तीन महिनादेखि भुक्तानी नपाउँदा पनि उधारोमा दूध बजारमा पठाउनुपर्ने बाध्यता किसानलाई छ। हिजो भएको छलफलपछि निजी डेरी सञ्चालक भने दशैँअघि भुक्तानी दिने विषयमा सहमति नजिक पुुगेको आचार्यले बताए।
तर, डीडीसीले दिनुपर्ने भुक्तानीबारे टुंगो लागेको छैन। कृषिमन्त्रीसँगको छलफलले निकास दिने अपेक्षा किसानले गरेका छन्। हिजै सरकारसँग वार्ताको तयारी गरिए पनि मन्त्री अधिकारी उपत्यका बाहिर भएकाले आज छलफल हुन लागेको हो।
भोलिसम्म बाँकी रकम पाउने सुनिश्चितता नभए पर्सीदेखि देशव्यापी आन्दोलनमा जाने चेतावनी किसानले दिएका छन्।
