मकवानपुर: मकवानपुरको बागमती गाउँपालिकामा मंगलबार शारीरिक अपाङ्गता परीक्षण घुम्ती शिविर संचालन भएको छ । गाउँपालिका र अपाङ्ग बाल अस्पताल तथा पुनर्स्थापना केन्द्र, बनेपा नगरपालिका-११ को सहकार्यमा शारीरिक अपाङ्गता भएका १८ वर्षमुनिका बालबालिका र व्यक्तिहरूको निःशुल्क स्वास्थ्य तथा पुनर्स्थापन घुम्ती शिविर सञ्चालन भएको हो ।
शिविर बागमती-६, फापरबारीस्थित बेतेनी स्वास्थ्य चौकीमा सञ्चालन भएको छ। शिविरमा जन्मजात खुट्टा फर्किएको, हड्डी टेढो(फेरिएको, ओठरतालु फाटेको, हातखुट्टा नबढेको, जलन वा पोलाइबाट टिस्यु गुमाएका, शरीर सिधा नरहेको जस्ता अवस्था भएका व्यक्तिको परीक्षण गरिएको छ भने आवश्यक उपकरणसमेत वितरण गरिएको छ। शिविरमा पहिचान भएका रोग तथा समस्याको संस्थाले निशुल्क उपचार गरिदिने भएको छ ।
कार्यक्रमका सुपरभाइजर रुद्र सापकोटाका अनुसार जेठ २१ र २२ गते सिन्धुलीको घ्याङलेख गाउँपालिकामा, २३ गते तिन पाटन गाउँपालिका, २४ गते दुधौली नगरपालिका, २५ गते हरिहरपुरगढी गाउँपालिका र २६ गते मरिण गाउँपालिकामा शिविर सञ्चालन हुने भएको छ ।
