हेटौँडा- रावा इनर्जि डेभलपमेन्ट लिमिटेडले अाज अर्थात जेठ १८ गतेदेखि सर्वसाधारणका लागि आईपीओ निष्काशन गरेको छ । कम्पनीले पहिलो चरणमा आयोजना प्रभावित क्षेत्रका स्थानिय बासिन्दा र वैदेशिक रोजगारीमा रहेका नेपालीहरुका लागि आईपीओ बाँडफाँट पछि सर्वसाधारणका लागि निष्कासन गरेकोे हो ।
कम्पनीले जारी पूँजी २८ करोड रुपैयाँको ३० प्रतिशतले हुन आउने कुल ८ करोड ४० लाख रुपैयाँ बराबरको ८ लाख ४० हजार कित्तामध्ये ५६ हजार कित्ता वैदेशिक रोजगारीमा रहेका नेपालीमा र ८७ हजार ६७० कित्ता शेयर आयोजना प्रभावित स्थानीयमा बाँडफाँट गरेको हो ।
आयोजना प्रभावित स्थानीयका लागि छुट्याएको २ लाख ८० हजार कित्ता शेयरमध्ये वितरण हुन नसकेको १ लाख ९२ हजार ३३० कित्तासमेत थप गरी सर्वसाधारणमा विक्री गर्न लागिएको हो ।
सर्वसाधारणमा कुल ६ लाख ९६ हजार ३३० कित्ता शेयर वितरण हुनेछ । यस मध्ये १५ हजार ४७ कित्ता शेयर कम्पनीका कर्मचारीका लागि र ३७ हजार ६१६ कित्ता शेयर सामूहिक लगानी कोषहरूलाई बाँडफाँट गरिएको छ । बाँकी रहेको ६ लाख ४३ हजार ६६७ कित्ता शेयर भने सर्वसाधारणमा सार्वजनिक निष्कासन ल्याएको हो ।
यो आईपीओ खरीदका लागि न्यूनतम १० कित्तादेखि अधिकतम १० हजार कित्तासम्म माग गर्न सकिने व्यवस्था छ ।
आईपीओ निष्कासन बन्द छिटोमा जेठ २२ गतेसम्मका लागि तोकिएको छ । उक्त अवधिभित्र माग बमोजिम आवेदन नपरेमा भने ढिलोमा जेठ ३२ गतेसम्म विक्री लम्बिनेछ । तर पछिल्लो समय सर्वसाधारणमा आईपीओ जारी हुँदा पहिलो दिनमै मागभन्दा बढी आवेदन पर्दै आएकाले कम्पनीको आईपीओ समेत छिटो अवधिभित्रै विक्रीमा रहने निश्चित छ ।
कम्पनीको आईपीओ निष्काशन तथा बिक्री प्रबन्धकमा प्रभु क्यापिटल लिमिटेड रहेको छ । विक्री प्रबन्धकसँगै लगानीकर्ताले सम्पूर्ण आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरुबाट आवेदन दिन सक्नेछन् । साथै मेरो शेयर सफ्टवेयर र मेरो शेयर एपमार्फत पनि आवेदन दिन सकिनेछ ।
आईपीओ निष्काशनको लागि गराएको रेटिङ्गमा केयर रेटिङ्ग नेपालले कम्पनीलाई दायित्व बहन गर्ने क्षमतामा औषत जोखिम रहेको संकेत गर्ने केयर एनपी डबल बी इस्युरअर रेटिङ्ग प्रदान गरेको छ ।
कम्पनीको परिचय
२०६६ साल साउन ३२ गते नेपाल सरकार कम्पनी रजिष्ट्रारको कार्यालयमा रावा इनर्जि डेभलपमेन्टको नाममा यो कम्पनी प्राइभेट लिमिटेड कम्पनीको रुपमा दर्ता भएकोे थियो । १० वर्ष पछि २०७६ असार १५ गते यो कम्पनी पब्लिक लिमिटेडमा परिणत भई रावा इनर्जि डेभलपमेन्ट लिमिटेडको नामबाट कारोबार सञ्चालन हुदै आएको हो ।
। कम्पनीको रजिष्टर्ड कार्यालय बानेश्वर काठमाडौंमा रहेको छ । यस कम्पनीले खोटाङ जिल्लामा ३ मेगावाट क्षमताको माथिल्लो रावा खोला जलविद्युत् आयोजना निर्माण सम्पन्न गरी व्यापारिक उत्पादन गर्दै आएको छ ।
कम्पनीले उक्त आयोजनाबाट २०७७ साल असोज १४ गतेदेखि व्यापारिक विद्युत् उत्पादन गर्दै आएको हो । उक्त आयोजनाको कुल लागत रू. ६४ करोड ६५ लाख रहेको छ भने प्रतिमेगावाट लागत रू. २१ करोड ५५ लाख छ । यस आयोजनाको विद्युत् उत्पादन अनुमति वहाल रहने अवधि २९ वर्ष ११ महिना बाँकी रहेको छ ।
कम्पनीको पूँजी समंरचना
अधिकृत पूँजी २८ करोड रूपैयाँ रहेको कम्पनीको जारी पूँजी २८ करोड रूपैयाँनै रहेको छ । हाल संस्थापक शेयरधनीहरूबाट चुक्ता भएको पूँजी १९ करोड ६० लाख रूपैयाँ मात्र छ । आयोजना प्रभावित स्थानीय सहित सर्वसाधारणमा आईपीओ बाँडफाँटपछि कम्पनीको चुक्तापूँजी २८ करोड रूपैयाँ कायम हुनेछ । कुल चुक्तापूँजीमा संस्थापक तर्फ ७० प्रतिशत र स्थानिय बासिन्दा सहित सर्वसाधारणमा ३० प्रतिशत शेयर स्वामित्व कायम हुनेछ ।
कम्पनीको वित्तीय अवस्था
आर्थिक वर्ष ०७८/७९ सम्मको वास्तविक वित्तीय विवरण अनुसार कम्पनी ३ करोड २९ लाख रूपैयाँभन्दा बढी सञ्चित नोक्सानीमा रहेको छ । चालू आर्थिक वर्ष ०७९/८० को अन्त्यसम्म भने कम्पनीले सञ्चित नोक्सानी घटाएर ७२ लाख ७८ हजार रूपैयाँमा झार्ने प्रक्षेपण गरेको छ । आर्थिक वर्ष ०७९/८० सम्मको वित्तीय विवरण अनुसार प्रतिशेयर आम्दानी ९ रुपैया २ पैसा र प्रतिशेयर नेटवर्थ ९७ रूपैयाँ ४ पैसा हुने कम्पनीले प्रक्षेपण गरेको छ । त्यस्तै कम्पनीले आर्थिक वर्ष २०८१/८२ को अन्त्यसम्ममा भने रू. ८४ लाख १९ हजार नाफा कमाउने प्रक्षेपण गरेको छ ।
कम्पनीको आईपीओले धितोपत्र दोस्रो बजारमा कति मूल्य पाउला ?
धितोपत्र प्राथमिक बजारमा विक्री गरी कम्पनीले यो आईपीओ कारोबारका लागि भने धितोपत्र दोस्रो बजार नेपाल स्टक एक्सचेञ्ज (नेप्से) मा सूचीकृत गराउँनेछ ।
सूचीकृत भएको दोस्रो कारोबार दिनदेखि कारोबारमा आउने कम्पनीको आईपीओलाई पहिलो कारोबार मूल्य नेप्सेले निर्धारण गर्नेछ ।
नेप्सेले कम्पनीको वास्तविक प्रतिशेयर नेटवर्थको आधारमा तीन गुणासम्मको मूल्य रेञ्ज तोक्नेछ ।
यसर्थ कम्पनीको वास्तविक प्रतिशेयर नेटवर्थको आधारमा न्यूनतम प्रतिकित्ता ८३ रूपैयाँ १० पैसा देखि अधिकतम प्रतिकित्ता २४९ रूपैयाँ ३ पैसासम्मको मूल्य रेञ्ज नेप्सेले पहिलो कारोबारका लागि तोक्ने देखिन्छ । पहिलो कारोबार पछिको मूल्य भने बजारमा लगानीकर्ताको माग र आपुर्तिका आधारमा निर्धारण हुनेछ ।
