काठमाण्डौं । आज र भोलि कोशी, बाग्मती र गण्डकीका केही ठाउँमा ठूलो पानी पर्ने सम्भावना छ । अहिले पनि कास्की, लमजुङ, गोरखा, धादिङसहित देशका विभिन्न ठाउँमा हल्कादेखि मध्यम वर्षा भइरहेको छ ।
पछिल्लो तीन घण्टामा कास्कीको लुम्लेमा झण्डै १८ मिलिमिटर वर्षा मापन भएको छ । त्यस्तै कर्णाली, बागमती र कोशी प्रदेशका पनि एकरदुई ठाउँमा मेघ गर्जनरचट्याङ्गसहित हल्कादेखि मध्यमसम्मको वर्षा भइरहेको छ ।
आज दिउँसो गण्डकीसहित कोशी, बागमती प्रदेशको केही ठाउँ तथा मधेश प्रदेशलगायत लुम्बिनी, कर्णाली र सुदूरपश्चिम प्रदेशको पहाडी र हिमाली भागका थोरै ठाउँमा मेघ गर्जन र चट्याङ्गसहित वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।
मौसमविद्का अनुसार काठमाण्डौ उपत्यकासहित आसपासका जिल्लामा आज बेलुका र राति ठूलो पानी पर्ने सम्भावना छ । आज र भोलि कोशी र गण्डकी प्रदेशका केही ठाउँमा ठूलो पानी पर्ने सम्भावना रहेको हुँदा आवश्यक सावधानी अपनाउन महाशाखाले आग्रह समेत गरेको छ ।
महाशाखाका अनुसार तराई क्षेत्रमा लगातार बढ्दै गएको तापक्रम पनि आजदेखि केही घट्ने अनुमान छ । तराईका केही ठाउँमा आंशिकदेखि सामान्य बदली रहने र केही ठाउँमा हल्का वर्षाको समेत सम्भावना छ । पानी परेपछि पश्चिम तराईमा पनि गर्मी कम हुने अनुमान छ ।
भोलि दिउँसो तराईका केही ठाउँमा हावाहुरीको पनि सम्भावना रहेको छ । पर्सि बिहीबार पनि पूर्वको मेचीदेखि पश्चिम त्रिशुली–कालिगण्डकीसम्म बेला–बेलामा पानी पर्ने अनुमान छ । अबका तीन दिन वर्षासँगै चट्याङ्ग र उच्च हिमाली क्षेत्रमा हिमपात तथा तराईका केही क्षेत्रमा हावाहुरीको समेत सम्भावना रहेकाले आवश्यक सतर्कता अपनाउन महाशाखाले आग्रह गरेको हो ।
त्यस्तै ठूलो पानी पर्न सक्ने सम्भावना भएका क्षेत्रमा अबका तीन दिन रातको समयमा सकभर यात्रा नगर्न सल्लाह छ । आकस्मिक बाढी आउन सक्ने, पहाडी क्षेत्रमा पहिरोको जोखिम र बाटो अवरुद्ध हुन सक्नेजस्ता सम्भावना हुने भएकाले आवश्यक सावधानी अपनाउन भनिएको छ ।