काठमाडौं । पूर्वप्रधानमन्त्री तथा नेकपा एमालेका अध्यक्ष केपी शर्मा ओली लाई प्रहरीले रिहा गरेको छ । जिल्ला प्रहरी परिसर काठमाडौंका एसपी पवनकुमार भट्टराईका अनुसार उनलाई अस्पतालमै परिवारको जिम्मा लगाइएको हो ।
प्रहरीले अबको निर्णय उनको स्वास्थ्य अवस्थाको आधारमा चिकित्सकको सल्लाहअनुसार हुने जनाएको छ ।
जेनजी आन्दोलन दमन गरेको आरोपमा उनलाई चैत १४ गते गुण्डुस्थित निवासबाट पक्राउ गरिएको थियो । त्यसपछि स्वास्थ्य समस्या देखिएपछि उनी त्रिवि शिक्षण अस्पताल मा उपचाररत रहेका थिए ।
उनकी पत्नी राधिका शाक्य ले गैरकानूनी हिरासतमा राखिएको दाबी गर्दै सर्वोच्च अदालत मा बन्दीप्रत्यक्षीकरणको निवेदन दिएकी थिइन् ।
सर्वोच्च अदालतले चैत २३ गते ओली र तत्कालीन गृहमन्त्री रमेश लेखक माथिको अनुसन्धान चैत २६ भित्र सक्न आदेश दिएको थियो ।
अदालतले तोकिएको समयभित्र अनुसन्धान नसकिए शर्तसहित रिहा गर्न पनि निर्देशन दिएको थियो ।
नियन्त्रणमुक्त भएपछि ओलीलाई लिन उनकी पत्नी राधिका शाक्य त्रिवि शिक्षण अस्पताल पुगेकी छन् ।