मकवानपुर — जिल्ला प्रशासन कार्यालय मकवानपुरले फागु पूर्णिमा (होली) पर्व मर्यादित, सभ्य र सुरक्षित वातावरणमा मनाउन सबै सरोकारवालालाई आग्रह गरेको छ। प्रतिनिधि सभा सदस्य निर्वाचन–२०८२ को प्रचारप्रसार तथा मौन अवधिसँगै होली पर्व परेकाले निर्वाचन सुरक्षा संवेदनशीलतालाई ध्यानमा राख्दै यस्तो निर्देशन जारी गरिएको हो।
प्रशासनले जिल्लास्थित सबै राजनीतिक दल, उम्मेदवार, दलका प्रतिनिधि, मतदाता तथा आम नागरिकलाई आपसी सद्भाव, शान्ति र सौहार्दपूर्ण वातावरण कायम राख्न अपिल गरेको छ।
सूचनामा निर्वाचन आचारसंहिता, २०८२ को पूर्ण पालना गर्न निर्देशन दिँदै उल्लंघनका घटनाबारे मुख्य निर्वाचन अधिकृतको कार्यालय, निर्वाचन अधिकृतको कार्यालय, प्रदेश निर्वाचन कार्यालय तथा नजिकको सुरक्षा निकायमा जानकारी गराउन भनिएको छ।
होलीका दिन भिडभाड हुने कार्यक्रम नगर्न, गर्नै परे जिल्ला प्रशासन कार्यालयबाट पूर्वअनुमति लिनुपर्ने उल्लेख गरिएको छ।
कसैको इच्छाविपरीत रंग दल्ने, लोला हान्ने, जबरजस्ती गर्ने, अमर्यादित तथा उच्छृङ्खल व्यवहार नगर्न प्रशासनले चेतावनी दिएको छ।
मदिरा तथा नशालु पदार्थ सेवन नगर्न, सेवन गरी सवारी साधन नचलाउन, सार्वजनिक स्थानमा चर्को ध्वनि (डिजे) बजाउन तथा छिमेकीलाई असर पर्ने गतिविधि नगर्न पनि आग्रह गरिएको छ।
प्रचलित कानुन तथा निर्वाचन आचारसंहिता विपरीत गतिविधि गरे कडा कारबाही गरिने प्रशासनले स्पष्ट पारेको छ। धार्मिक सहिष्णुता र सामाजिक सद्भाव कायम राख्दै होली मनाउन सबैलाई अनुरोध गरिएको छ।