मकवानपुर । सुशीला कार्की नेतृत्वको मन्त्रिपरिषदका सदस्यहरुको शपथ आज बिहान साढे ११ बजे हुने भएको छ।
राष्ट्रपति कार्यालयले केहीबेर अघि शपथ ग्रहणको समयबारे जानकारी दिएको हो। यस अघि आजै बिहान राष्ट्रपति कार्यालयका सूचना अधिकारी सहसचिव अर्चना खड्का अधिकारीले शपथको समयबारे जानकारी नआएको बताएकी थिइन्।
राष्ट्रपति रामचन्द्र पौडेलका प्रेस संयोजक खिला कार्कीले बिहान साढे ११ बजे शपथ ग्रहण समारोह हुने र शीतल निवास परिसरमा टेन्टमुनि गरिने बताए। अहिले टेन्ट राख्ने काम भइरहेको उनको भनाइ छ।
गत शुक्रबार अन्तरिम सरकारको प्रधानमन्त्रीमा नियुक्त सुशीला कार्कीले आइतबार तीन जना मन्त्री नियुक्त गरेकी थिइन्। अर्थ मन्त्रीमा रामेश्वर खनाल, गृहमन्त्रीमा ओमप्रकाश अर्याल र ऊर्जा मन्त्रीमा कुलमान घिसिङको नाम टुंगो लागे बताइएको छ।
अर्यालले कानुन मन्त्रालयको समेत जिम्मेवारी पाउने र घिसिङलाई ऊर्जाका अलवा भौतिक पूर्वाधार तथा यातायात र शहरी विकास मन्त्रालयको समेत जिम्मेवारी दिने तयारी छ।
तर मन्त्री नियुक्तिप्रति सुदन गुरुङ समूहका केही युवाहरुले असन्तुष्टि जनाएका छन्।